ملکی تاریخ میں پہلی بار پنجاب اسمبلی کا اجلاس مقامی ہوٹل میں ہوگا

لاہور(مانیٹرنگ ڈیسک)ملکی تاریخ میں پہلی بار پنجاب اسمبلی کا اجلاس مقامی ہوٹل میں بلانے کا فیصلہ کیا گیا ہے۔

سپیکرپنجاب اسمبلی چوہدری پرویز الٰہی کا کہنا ہے کہ رولز 235 کے تحت مقامی ہوٹل کے کرسٹل اور رائل گرینڈ ہالز کو اسمبلی چیمبر ڈکلیئر کر دیا گیا ہے۔سپیکر پنجاب اسمبلی کے مطابق اسمبلی کے ہال میں اراکین کا کورونا ایس او پیز کے مطابق بیٹھنا ممکن نہیں اس لیے کووڈ- 19 کے ایس او پیز کے مطابق اسمبلی ارکان کا سٹنگ پلان تیار کیا گیا ہے۔

چوہدری پرویز الٰہی نے کہا کہ تمام سیاسی جماعتیں اپنے ارکان کے کورونا ٹیسٹ یقینی بنائیں تاکہ وہ اجلاس میں شریک ہو سکیں۔ سپیکر پنجاب اسمبلی نے اجلاس 5 جون بروز جمعہ 3 بجے فلیٹیز ہوٹل میں طلب کیا ہے۔

خیال رہے کہ پاکستان میں کورونا وائرس کے کیسز میں تیزی سے اضافہ ہورہا ہے جب کہ کورونا وائرس سے صوبائی اسمبلیوں کے اراکین بھی متاثر ہو رہے ہیں۔