Buy website traffic cheap


ملک میں گزشتہ سال 20 ہزار سے زائد کمپنیاں رجسٹرڈ ہوئیں، مشیر تجارت

اسلام آباد: وزیراعظم کے مشیر برائے تجارت عبدالرزاق داود نے کہا ہے کہ ملک میں گزشتہ سال 20 ہزار سے زائد کمپنیاں رجسٹرڈ ہوئیں، اصلاحات کے نتیجے میں پاکستان کی ای او ڈی بی رینکنگ میں غیر معمولی بہتری آئی ۔

پیر کو سماجی رابطے کی ویب سائٹ ٹوئٹر پر اپنے بیان میں عبدالرزاق داود نے سکیورٹی اینڈ ایکسچینج کمیشن اور بورڈ آف انویسمنٹ کو سراہتے ہوئے انہیں پاکستان میں نئی کمپنیوں کی آمد کا کریڈٹ دیا۔ انہوں نے کہا کہ سرمایہ کاروں کی حوصلہ افزائی کرتے ہیں کہ ایس ای سی پی کی جانب سے کاروبار کو باقاعدہ قانونی شکل دینے کی پیشکش کا فائدہ اٹھائیں۔

مشیر تجارت کا کہنا تھا کہ 2018 اور 2019 کے مقابلے میں سال 2020 میں پاکستان میں کمپنیوں کی رجسٹریشن میں 54 فیصد اضافہ ہوا جب کہ جنوری 2021 میں 2201 کمپنیاں ایس ای سی پی کے ساتھ رجسٹرڈ ہوئیں جو گزشتہ ماہ کے مقابلے میں 12 فیصد زیادہ ہیں۔ انہوں نے مزید کہا کہ ہمیں یہ بتاتے ہوئے خوشی ہورہی ہے کہ اصلاحات کے نتیجے میں پاکستان کی ای او ڈی بی رینکنگ میں غیر معمولی بہتری آئی جب کہ پاکستان میں کمپنیوں کی رجسٹریشن میں بھی اضافہ ہوا اور گزشتہ سال 20342 کمپنیاں رجسٹرڈ ہوئیں۔