ٹیکنالوجی کی دنیا میں ہر گزرتے دن کے ساتھ جدت پسندی کا رحجان دیکھنے کو مل رہا اور نت نئے شاہکار متعارف کرانے کی دوڑ میں شامل ہر کوئی ایک دوسرے پر سبقت لے جانے کی کوشش میں ہے ایسے میں چینی موبائل کمپنی اوپو بھی اب کسی سے پیچھے نہیں رہی جو جلد ہی دنیا کی تیز ترین چارجنگ ٹیکنالوجی متعارف کروانے جارہی ہے۔

ٹیکنالوجی ویب سائٹ جی ایس ایم ارینا کے مطابق ابھی کسی فون میں سب سے فاسٹ چارجنگ ٹیکنالوجی 65 واٹ کی ہے مگر اوپو کی جانب سے 15 جولائی کو جو ٹیکنالوجی متعارف کرائے جائے گی وہ 125 واٹ سپر فلیش چارج ہوگی۔
اس نئی ٹیکنالوجی کو متعارف کروانے کے حوالے سے چین میں بدھ کو اوپو کمپنی کی جانب سے ڈیمو بھی دیا جائے گا اور تمام معلومات سے آگاہ بھی کیا جائے گا۔
واضح رہے کہ 65 واٹ کی فاسٹ چارجنگ سے اوپو رینو ایس کی 4000 ایم اے ایچ بیٹری 10 منٹ میں 48 فیصد تک چارج ہوجاتی ہے تاہم ممکن ہے کہ 125 واٹ فاسٹ چارجنگ ٹیکنالوجی سے فون کی بیٹری صرف 15 منٹ کے اندر صفر سے 100 فیصد تک چارج ہوسکتی ہے۔
یہ موبائل کا شوق رکھنے والے صارفین کے لئے بڑی خبر ہے کہ اوپو کی بیٹری اب پندرہ منٹ میں صفر سے سو فیصد چارج ہوسکے گی