اسلام آباد:وزیر خارجہ شاہ محمود قریشی نے کہا ہے کہ بھارت اپنی بربریت سے کشمیریوں کی جدوجہد آزادی دبا نہیں سکتا،دنیاغیرقانونی طورپر بھارت کی انسانی حقوق کی سنگین پامالیاں روکے۔

تفصیلات کے مطابق وزیر خارجہ شاہ محمود قریشی نے بھارت کے خلاف کشمیریوں کے یوم سیاہ پر پیغام میں کہا ہے کہ 27اکتوبر1947 کشمیریوں کے لیے تاریک ترین ہے، اس دن بھارت نےغیر قانونی طور پر جموں وکشمیر پر قبضہ کیا۔

شاہ محمود قریشی کا کہنا تھا کہ کشمیری مسلسل محاصرے میں ہیں، کشمیریوں کو چھاپوں اور تلاشی کی آڑ میں نشانہ بنایا جارہا ہے، ہزاروں کشمیریوں نے جدوجہد میں جانوں کے نذرانے پیش کیے۔

وزیر خارجہ نے مزید کہا کہ بھارت جبر سے کشمیریوں کی آزادی کی جدوجہد کو دبا نہیں سکتا، بھارتی بے رحمی سے کشمیریوں کا آہنی عزم مزید مضبوط ہوا ہے، دنیاغیرقانونی طورپر بھارت کی انسانی حقوق کی سنگین پامالیاں روکے۔ عالمی سول سوسائٹی اورمیڈیا نے مظلوم کشمیریوں کی حالت زارکوبے نقاب کیا ،کشمیریوں کی امنگوں کے مطابق مسئلے کے حل تک ان کا ساتھ دیتے رہیں گے۔

دوسری جانب وزیرخارجہ شاہ محمود قریشی نے کہا ہے کہ عالمی برادری کو افغان عوام کی مدد کیلئے مزید اقدامات کرنا ہوں گے۔ تہران میں افغانستان کے ہمسایہ ممالک کے وزرائے خارجہ کا اجلاس ہوا جس سے وزیر خارجہ شاہ محمود قریشی نے بھی خطاب کیا۔ ان کا کہنا تھا کہ افغان عوام کو کھانے پینے کی اشیا اور ادویات کی فوری ضرورت ہے، عالمی برادری کو افغانستان کی موجودہ حکومت سےتعاون کرنا ہو گا۔ انہوں نے مزید کہا کہ افغانستان کو انسانی بحران سے بچانے کیلئے اقوام عالم اپنا کردار ادا کریں۔