لاہور (مانیٹرنگڈیسک) پاکستان کرکٹ بورڈ (پی سی بی) نے ایچ بی ایل پاکستان سپر لیگ کے پانچویں ایڈیشن کے دوران گراونڈ سٹاف کی انتھک محنت کو سراہتے ہوئے، ان کے لئے مالی انعام کا اعلان کیا ہے۔

ترجمان پی سی بی کے مطابق لاہور، کراچی، راولپنڈی اور ملتان کے سٹیڈیمز کے گرائونڈ سٹاف میں شامل 63 افراد پر مشتمل عملے کو احسن انداز میں ذمہ داریاں نبھانے پر بونس دینے کا اعلان کیا ہے۔ ان 63 افراد کو ماہ اگست میں ان کی تنخواہ کا 50 فیصد اضافی حصہ انہیں بطور بونس دیا جائے گا۔

اس کے علاوہ پی سی بی نے ڈیلی ویجز پر کام کرنے والے گرائونڈ سٹاف کے عملے میں شامل 5 افرادکے لئے 10 ہزار روپے انعام کا اعلان کیا ہے۔ رواں سال پاکستان کرکٹ بورڈ نے ایچ بی ایل پی ایس ایل کے تمام میچز پاکستان میں کرواکے تاریخ رقم کی تاہم کووڈ۔19 کی وبا کے سبب ایونٹ کے پلے آف میچز اور فائنل ملتوی کرنے پڑے۔

گراونڈ سٹاف کے ان 68 رکنی عملے کی انتھک محنت کی بدولت شائقین کرکٹ کو ایچ بی ایل پی ایس ایل کے دوران اعلیٰ معیار کے کرکٹ مقابلے دیکھنے کو ملے۔

گراونڈ سٹاف کی جانب سے معیاری پچز اور آئوٹ فیلڈ کی شاندار تیاری کے سبب ملک کے چاروں سےنٹرز پر شائقین کرکٹ کی حاضری مجموعی طور پر 87 فیصد رہی، پاکستان کرکٹ بورڈ کے چیف آپریٹنگ آفیسر سلمان نصیر کا کہنا ہے کہ اگرچہ کرکٹ میچز کو خوشگوار انداز میں پایہ تکمیل تک پہنچانے میں گرائونڈ سٹاف کا کردار انتہائی اہم ہے مگر پھر بھی یہ ایسی ملازمت ہے جس کی ستائش نہیں کی جاتی لہٰذا یہ بہت ضروری ہے کہ ان کے کام کو سراہا جائے اور انہیں اس کا انعام بھی دیا جائے۔

سی او پی سی بی نے کہا کہ ہمارے گرائونڈ سٹاف نے خراب موسم کا سامنا کرنے کے باوجود رواں سال کے آغاز میں ایچ بی ایل پی ایس ایل کے دوران شاندار اور مثالی کام کیا۔ انہوں نے کہا کہ اس عملے نے اپنی سخت محنت اور لگن کی بدولت شاندار پچز اور آئوٹ فیلڈ تیار کیں جس کی بدولت شائقین کرکٹ کو ایونٹ کے دوران بہترین ٹی ٹونٹی کرکٹ دیکھنے کو ملی۔

سلمان نصیر نے مزید کہا کہ ایک طویل عرصے بعد ہم اپنی تمام تر کرکٹ ملک میں واپس لانے کی کوشش کر رہے ہیں اور جس انداز سے ہمارا گرائونڈ سٹاف کام کر رہا ہے، اس سے پرستاروں کو آئندہ بھی کرکٹ کے شاندار مقابلے دیکھنے کو ملیں گے