کیا آپ جانتے ہیں کہ کرنسی نوٹ جنہیں ہم کاغذ کے نوٹ کہتے ہیں وہ اصل میں کاغذ سے نہیں بنائے جاتے۔کرنسی نوٹوں کی پائیداری میں اضافے اور جعلی نوٹوں کی چھپائی کو روکنے کے لئے کرنسی نوٹ ایک خاص طور پر ڈیزائن کئے گئے آمیزے سے تیار کئے جاتے ہیں۔ اس آمیزے میں عام طور پر کپاس کا اور بعض اوقات پَٹ سن کا ریشہ شامل ہوتا ہے۔ کپاس کا ریشہ بینک نوٹوں کو لچک عطا کرتا اور ان کی عمر میں اضافہ کرتا ہے جبکہ پٹ سن کا ریشہ انہیں پائیدار بناتا ہے۔ اس کا مطلب یہ ہے کہ کرنسی نوٹ کسی دفتر کے صفحے کی طرح جلدی بوسیدہ نہیں ہوتے اور لمبے عرصے تک استعمال کئے جا سکتے ہیں۔ کپاس کے ریشے کی وجہ سے ، اعلیٰ معیار کے کاغذ کے مقابلے میں بھی، کرنسی نوٹ زیادہ پائیدار ہوتا ہے اور پانی اور مستقل گردش کے باوجود دیر تک برقرار رہتا ہے۔
بعض ممالک نوٹوں کی تیاری میں کپاس کے ریشے کی بجائے پولیمر نامی پلاسٹک لوازمات کا استعمال بھی کر رہے ہیں ۔ پولیمر بینک نوٹ سب سے پہلے 1988 میں آسٹریلیا میں استعمال کرنا شروع کئے گئے اور تب سے متعدد ممالک نے اس ٹیکنالوجی کو اپنا رکھا ہے۔ پولیمر لوازمات کا سب سے بڑا فائدہ یہ ہے کہ اس کی پائیداری کپاس کے ریشے سے کہیں زیادہ ہوتی ہے۔ پولیمر سے تیارہ شدہ بینک نوٹ زیادہ طویل العمر ہوتا ہے لہٰذا بار بار نئے نوٹ چھاپنے کی ضرورت نہیں پڑتی۔
