قومی کرکٹ ٹیم کے سابق کپتان شعیب ملک کی سابقہ اہلیہ ثانیہ مرزا نے دبئی کے اپنے نئے گھر سے شوہر کا نام ہٹادیا۔ میڈیا رپورٹس کے مطابق دبئی میں بھارتی ٹینس اسٹار ثانیہ مرزا کے وِلا کا کام مکمل ہوگیا جبکہ فنشنگ کی جارہی ہے جس کے بعد وہ اپنے بیٹے اذہان کے ہمراہ اس گھر میں منتقل ہوجائیں گی۔
ثانیہ مرزا اپنے بیٹے اذہان کے ساتھ طویل عرصے سے متحدہ عرب امارات میں مقیم ہیں۔ قبل ازیں خبریں سامنے آئیں تھی کہ بھارتی ٹینس اسٹاراور متحدہ عرب امارات کے بزنس ٹائیکون عدیل ساجن کے درمیان ممکنہ تعلقات قائم ہوئے ہیں، تاہم تصدیق نہیں ہوسکی،عدیل ساجن دبئی میں بھارتی ٹینس اسٹار کے وِلا کو ڈیزائن کررہے تھے۔ گھر پر لکھی نیم پلیٹ سے ثانیہ مرزا نے شعیب ملک کو ہٹاکر اب ان کی جگہ اپنے بیٹے اذہان کا نام لکھا ہے۔
بھارتی ٹینس اسٹار دبئی اور حیدرآباد میں دو ٹینس اکیڈمیز چلارہی ہیں،اس کے علاوہ ٹی وی نشریات میں سونی اسپورٹس نیٹ ورک کے ساتھ بھی منسلک ہیں،انہوں نے رواں ماہ آسٹریلین اوپن 2025 کی کوریج پر بھی کام کیا تھا۔
ثانیہ مرزا کاکہناہے کہ ان کی زندگی کی پہلی ترجیح اب ان کا بیٹا اذہان ہے جو ان کا بہترین دوست ہے۔
واضح رہے کہ ثانیہ مرزا اور شعیب ملک 2010 میں شادی کے بندھن میں بندھے تھے، تاہم 14 سال بعد 2024 میں دونوں کے درمیان علیحدگی ہوئی،ان کا بیٹا اذہان 2017 میں پیدا ہوا تھا،شعیب ملک کے ساتھ شادی کے بعد ثانیہ مرزادبئی آگئی تھیں اور وہیں سے اپنی اکیڈمی چلارہی ہیں۔
بھارتی ٹینس اسٹار ثانیہ مرزا نے 2023 میں پروفیشنل ٹینس سے ریٹائرمنٹ لے لی تھی،انہوں نے اپنے کیریئرکے دوران 6 گرینڈ سلیم ٹائٹلز اپنے نام کیے تھے۔
