محسن سپیڈ نے دنیائے کرکٹ کا منفرد ریکارڈ بنا ڈالا، صرف 110 روز میں قذافی سٹیڈیم کا 99 فیصد کام مکمل ہو گیا۔
چیئرمین پاکستان کرکٹ بورڈ محسن نقوی علی الصبح قذافی سٹیڈیم پہنچ گئے، محسن نقوی نے سٹیڈیم کے مختلف فلورز اور ہاسپٹیلٹی باکسز کے فنشنگ ورک کا معائنہ کیا اور باکسز کے سامنے لگائی ریلنگ کے معیار کو چیک کیا۔
محسن نقوی نے باکسز کے باہر لگائی نشستوں پر بیٹھ کر گراؤنڈ کے ویو کو دیکھا اور فلورز کے فنشنگ ورک کا بھی معیار چیک کیا، چیئرمین پی سی بی نے فنشنگ ورک کو برق رفتاری سے مکمل کرنے کی ہدایت کی، چیف آپریٹنگ آفیسر سمیر احمد نے فنشنگ ورک پر پیشرفت بارے چیئرمین پی سی بی کو بریفنگ دی۔
اس موقع پر گفتگو کرتے ہوئے چیئرمین پاکستان کرکٹ بورڈ محسن نقوی کا کہنا تھا کہ فنشنگ ورک میں معیار کو ہر صورت یقینی بنایا جائے، قذافی سٹیڈیم تکمیل کے قریب ہے، وزیر اعظم محمد شہباز شریف 7 فروری کو افتتاح کریں گے، چیمپئنز ٹرافی کے میچز دیکھنے والے شائقین نئے سٹیڈیم کی سہولتوں سے لطف اندوز ہو سکیں گے۔
