لاہور: ملک کے مختلف شہروں میں دھند ہی دھند کا راج رہا، حد نگاہ کم ہونے پر موٹر ویز متعدد مقامات سے بند کر دی گئی جس سے مسافروں کو شدید مشکلات کا سامنا کرنا پڑا۔
موٹروے ایم3 لاہور سے رجانہ تک ٹریفک کیلئے بند کی گئی، ایم 4پر شور کوٹ سے ملتان تک داخلہ ممنوع قراردیا گیا، موٹروے ایم 5پر بھی ملتان سے روہڑی تک انٹری بند کر دی گئی، قومی شاہراہوں پر حد نگاہ کم ہونے پر ٹریفک کی روانی شدید متاثر ہوئی۔
ملک کے مختلف شہروں میں سردی کی شدت بھی برقرار رزہی، اسلام آباد، مری، گلیات اور بالائی علاقوں میں کہرا پڑنے کا امکان پیدا ہوگیا، بلوچستان کے شمال مغربی اضلاع میں مطلع جزوی ابر آلود رہنے کی پیش گوئی کی گئی، بالائی علاقوں میں کڑاکے کی سردی پڑی۔
لہہ،استور،گوپس، سکردو میں پارہ منفی 10 تک گر گیا، بگروٹ، کالام اور گلگت میں منفی 6 رہا۔
