اسلام آباد:محکمہ موسمیات نے میں موسم کی صورت حال اور ممکنہ بارش کے حوالے سے پیش گوئی کی ہے۔آج پیر کے دن (17 فروری) کو موسم زیادہ تر خشک رہنے کی توقع ظاہر کی گئی ہے جب کہ نمی کا تناسب 31 سے 35 فی صد جب کہ وفاقی دارالحکومت اسلام آباد میں فضائی آلودگی کا انڈیکس 152 ہے۔
محکمہ موسمیات کے مطابق طویل خشک سالی کے بعد 18فروری سے20فروری تک بارش کا سسٹم پاکستان میں داخل ہوگا۔ اس حوالے سے مزید بتایا گیا ہے کہ اس دورانیے میں اسلام آباد، راولپنڈی، اٹک، جہلم، چکوال اور اندرونِ پنجاب بارشوں کا امکان ہے۔اسی طرح اسلام آباد اور راولپنڈی میں پولن ہائی رہے گی اور اس میں اضافہ ہوگا۔
پنجاب میں بادل کب برسیں گے؟
دریں اثنا محکمہ موسمیات نے بتایا ہے کہ لاہور سمیت پنجاب کے بیشتر اضلاع میں موسم ابر آلود رہے گا۔ سورج اور بادلوں کے درمیان آج آنکھ مچولی کا سلسلہ جاری ہے جب کہ بارش کے امکانات نہیں ہیں جس کی وجہ سے موسم خشک رہے گا۔
کل بادل برسانے والا سسٹم پاکستان میں داخل ہوگا اور منگل کے روز پنجاب کے مختلف اضلاع میں بارش کے امکانات ہیں۔ آج لاہور میں کم سے کم درجہ حرارت 10 ڈگری سینٹی گریڈ ریکارڈ کیا گیا ، جس کے زیادہ سے زیادہ 25 ڈگری تک جانے کے امکانات ہیں۔
موسم بدل سکتا ہے
موسمیاتی تجزیہ کاروں کا کہنا ہے کہ طاقت ور مغربی ہواؤں کی وجہ سے 22 فروری تک ملک کا موسم بدل سکتا ہے، جس کے نتیجے میں کئی علاقوں میں ہلکی اور تیز بارش ہوگی جب کہ پہاڑوں پر برف باری کے امکانات ظاہر کیے گئے ہیں۔
طاقت ور مغربی ہواؤں کا یہ سسٹم ملک کے 80 فی صد تک شمالی علاقوں کو بھی متاثر کرے گا۔ یہ سسٹم کے پی کے، گلگت بلتستان، آزاد کشمیر پر بھی اثر انداز ہوگا، جس کی وجہ سے پہاڑوں پر برف باری اور کئی علاقوں میں تیز بارش برسے گی۔
بلوچستان میں اچھی بارش ہوگی
سندھ کے حوالے سے بتایا گیا ہے کہ فی الحال موسمیاتی سسٹم کے نتیجے میں بارش کا امکان نہیں، تاہم بلوچستان میں اسی سسٹم کے نتیجے میں اچھی بارشوں کے امکانات ہیں جب کہ کوئٹہ، زیارت، ژوب، قلعہ سیف اللہ اور خضدار میں پہاڑوں پر برفباری ہو سکتی ہے۔
اُدھر پنجاب میں بھی 19 تا 21 فروری اچھی بارش کی توقع کی گئی ہے جب کہ جنوبی و وسطی علاقوں میں بارش کے 2 یا 3 اسپیل ہونے کا امکان ہے۔ اسی طرح وفاقی دارالحکومت اسلام آباد میں بھی بارش کے 2 یا 3 اسپیل ہوں گے۔
کراچی میں بارش کا امکان نہیں
نئے سسٹم کے زیر اثر سندھ میں سکھر، لاڑکانہ اور کچھ دیگر علاقوں میں ہلکی بوندا باندی کی توقع ہے تاہم کراچی میں بارش کے کوئی امکانات نہیں ہیں، البتہ موسم جزوی طور پر ابر آلود رہ سکتا ہے۔
