پاکستانی شوبز انڈسٹری کی نامور اداکارہ مہوش حیات 7 سال کے طویل وقفے کے بعد دوبارہ ٹی وی اسکرین پر جلوہ گر ہونیوالی ہیں، نئے ڈرامے کے ٹریلر نے سوشل میڈیا پر دھوم مچادی۔
پاکستان کی خوبرو اداکارہ مہوش حیات جو اپنی بے مثال اداکاری کیلئے مشہور ہیں، آخری بار 2016ء میں ڈرامہ سیریل “دل لگی” میں ہمایوں سعید کے ساتھ نظر آئی تھیں۔
سیون اسکائی انٹرٹینمنٹ کے یوٹیوب چینل پر ایک ٹائٹل ریلیز کیا گیا جسے 24 گھنٹے سے بھی کم وقت میں ڈھائی لاکھ افراد نے دیکھا ہے۔
مہوش حیات اب ایک سنسنی خیز اور تجسس سے بھرپور کردار میں واپس آرہی ہیں اور اس بار ان کا نیا ڈرامہ مداحوں کو حیران کردے گا۔
ٹیزر میں مہوش حیات کی آواز میں ڈائیلاگ سنائی دیتا ہے ’’خوشیوں سے میرا رشتہ مختصر سا ہے، اس لئے میں خود کو ان کا عادی نہیں بناتی‘‘۔
ٹیزر میں ان کے ساتھ احسن خان اور حرا مانی بھی نظر آتے ہیں، ٹریلر کے آخر میں ایک سانگ ’’بنا کے تماشہ جو ہنستے رہے، انہیں اب تماشہ بنایا جائے گا‘‘، سنا جاسکتا ہے۔
اس پراجیکٹ کے ہدایت کار سراج الحق ہیں جبکہ فاطمہ فیضان اور عنبر اظہر کی تحریر کردہ یہ کہانی محبت، معمہ اور گہرے رازوں پر مبنی ہوگی۔
ڈرامے میں عثمان پیرزادہ، زینب قیوم، نیئر اعجاز، سہیل سمیع، اسامہ طاہر، ندا ممتاز، شمیل خان، افشین حیات اور زہرہ عامر بھی اداکارہ کے جوہر دکھائیں گے۔
مہوش حیات نے پاکستانی ڈراموں میں مقبولیت حاصل کرنے کے بعد ہالی ووڈ میں بھی قدم رکھا اور مارویل اسٹوڈیوز کی “مس مارویل” میں اداکاری کرکے بین الاقوامی سطح پر نام بنایا۔
