ماہرین کا کہنا ہے کہ چکنائی کے بافتے وزن کم ہونے کے بعد بھی موٹاپے کی ایک قسم کی یادداشت رکھتے ہیں جو وزن کے دوبارہ بڑھنے کے امکانات کو بڑھا دیتے ہیں۔
تحقیق میں ’یو یو افیکٹ‘ (ڈائیٹ کے بعد ایک دم سے وزن کا بڑھ جانا) کے ساتھ لوگوں کے وزن کم کرنے کے لائحہ عمل جس میں ان کا وزن دوبارہ بڑھا، پر روشنی ڈالی گئی۔ محققین کے مطابق مطالعے کے نتائج مستقبل میں وزن قابو کرنے کے لائحہ عمل میں مدد دے سکتے ہیں۔
موٹاپے کے علاج میں ایک واضح ہدف طرزِ زندگی کا بدلنا ہوتا ہے تاکہ وزن کو کم کیا جاسکے اور ذیا بیطس یا جگر کے مرض جیسی ثانوی پیچیدگیوں سے بچا جا سکے۔عام طور پر موٹاپے سے نمٹنے کے لیے لوگ اپنی غذاؤں میں تبدیلی لاتے ہیں اور ورزش کو اپنے روزمرہ معمول کا حصہ بنا لیتے ہیں۔ جبکہ کچھ افراد وقتی طور پر تو وزن کم کر لیتے ہیں لیکن بعد اس میں دوبارہ اضافہ ہو جاتا ہے۔
محققین کو شبہ ہے کہ ایسا ہونے کی وجہ جسم کے بافتوں میں موٹاپے کی یادداشت ہو سکتی ہے۔ تاہم اس کے پیچھے موجود حقیقت ابھی واضح نہیں۔نئی تحقیق میں سائنس دانوں کو معلوم ہوا کہ انسان اور چوہے کے چکنائی کے بافتے جینیاتی سرگرمی کی تبدیلیاں ظاہر کرتے ہیں جو کہ وزن میں واضح کمی کے بعد بھی برقرار رہتی ہیں۔
