سنچورین: جنوبی افریقہ کے خلاف پہلے ٹیسٹ میچ میں پاکستان ٹیم 211 رنز بنا کر آؤٹ ہوگئی۔ کامران غلام 54 رنز کے ساتھ سب سے زیادہ اسکور کرنے والے بیٹر رہے۔
جنوبی افریقہ نے ٹاس جیت کر پہلے بولنگ کرنے کا فیصلہ کیا اور ہوم ٹیم کے بولرز نے کنڈیشنز کا فائدہ اٹھاتے ہوئے پاکستانی بلے بازوں کو لمبے اسکور کی اجازت نہیں دی۔ پاکستان کی ابتدائی وکٹیں تیزی سے گریں: شان مسعود 17، صائم ایوب 14، اور بابر اعظم 4 رنز بنا کر آؤٹ ہوئے۔
کامران غلام اور محمد رضوان نے پانچویں وکٹ پر 81 رنز کی شراکت داری قائم کی، جس سے پاکستان کی اننگز کو کچھ استحکام ملا۔ کامران غلام 54 رنز پر آؤٹ ہوئے، جبکہ محمد رضوان نے 27 رنز بنائے اور وہ بھی پویلین واپس چلے گئے۔
سلمان علی آغا اور عامر جمال نے ساتویں وکٹ پر 53 گیندوں پر 47 رنز کی شراکت داری کی، لیکن آخرکار پاکستان کی پوری ٹیم 211 رنز پر آؤٹ ہوگئی، جس میں خرم شہزاد اور محمد عباس نے آخری وکٹ پر کچھ رنز کا اضافہ کیا۔
جنوبی افریقی بولرز میں ڈین پیٹرسن نے 5 وکٹیں حاصل کیں، کوربن بوش نے 4 وکٹیں لی، اور مارکو یانسین نے ایک وکٹ حاصل کی۔
