پاکستان سپر لیگ (پی ایس ایل) کے 10ویں ایڈیشن کےلیے پلیئرز ڈرافٹ 11 جنوری کو ہوگی۔
رواں ہفتے ملکی اور غیر ملکی کھلاڑیوں کی رجسٹریشن شروع ہوجائےگی، پاکستان کرکٹ بورڈ نے ڈرافٹ کا پرومو جاری کر دیا۔
دنیائے کرکٹ کی ایک مقبول کرکٹ لیگ ’پاکستان سپر لیگ‘جس کا 10واں ایڈیشن آئی سی سی چیمپنز ٹرافی کی وجہ سے اپریل مئی میں منعقد کیا جائے گا۔
پی ایس ایل کی حتمی تاریخوں کا اعلان ہونا باقی ہے لیکن پاکستان کرکٹ بورڈ نے پلیئرز ڈرافٹنگ کا پرومو جاری کردیا ہے۔
پی ایس ایل ٹین کی پلیئرز ڈرافٹ 11 جنوری کو ہو گی، لیکن کہاں ہو گی ؟ اس کا فیصلہ ہونا باقی ہے۔ ایک تجویز یہ بھی ہے کہ ڈرافٹنگ بیرون ملک کی جائے، لیکن اس کا فیصلہ رواں ہفتے ہونے والی پی ایس ایل میٹنگ میں کیا جا سکتا ہے۔
ذرائع کے مطابق ملکی اور غیرملکی کھلاڑیوں کی رجسٹریشن کا آغاز رواں ہفتے ہوگا۔
ایونٹ میں 6 ٹیمیں کراچی کنگز، لاہور قلندرز، ملتان سلطانز، اسلام آباد یونائیٹڈ، پشاور زلمی اور کوئٹہ گلیڈی ایٹرز ایکشن میں ہوں گی۔
