پاکستان کے قومی اسمبلی کے سپیکر ایاز صادق نے بدھ کو پاکستان تحریک انصاف (پی ٹی آئی) کے گرفتار ارکان قومی اسمبلی کے پروڈکشن آرڈر جاری کرتے ہوئے انھیں پارلیمنٹ کے موجودہ جاری اجلاس میں پیش کرنے کی ہدایت کی ہے۔
جن اراکینِ پارلیمنٹ کے پروڈکشن آرڈر جاری کیے گئے ان میں عامر ڈوگر، زین حسین قریشی، وقاص اکرم، شیر افضل، محمد احمد چھٹہ، زبیر خان وزیر، اویس حیدر جکھڑ، سید شاہ احد علی شاہ، نسیم علی شاہ اور محمد یوسف خان شامل ہیں۔
سپیکر نے پروڈکشن آرڈر قومی اسمبلی کے قواعد و ضوابط کے طریقہ کار 2007 کے قاعدہ 108 کے تحت تفویض شدہ اختیارات کو بروئے کار لاتے ہوئے جاری کیے ہیں۔
قومی اسمبلی سیکرٹریٹ کی جانب سیکرٹری داخلہ، چیف کمشنر اسلام آباد، آئی جی اسلام آباد کو مراسلہ جاری کرتے ہوئے زیرِ حراست ممبران پارلیمنٹ کی اسمبلی کے رواں اجلاس میں شرکت کو یقینی بنانے کی ہدایت کی ہے۔
