دبئی میں بھی آئی سی سی چیمپئنز ٹرافی 2025 کے سلسلے میں سرگرمیاں جاری ہیں۔ کہیں چیمپئنز ٹرافی کے بینرز لگائے جارہے ہیں تو کہیں دبئی کے خوشگوار موسم میں کچھ کرکٹرز شاپنگ کرنے نکل گئے اور کچھ نے دوستوں کے ساتھ گپ شپ کو ترجیح دی۔
دبئی کرکٹ اسٹیڈیم اور اطراف میں بارش نے موسم کو خوشگوار بنا دیا، ٹورنامنٹ کھیلنے والی ٹیمین بھارت اور بنگلادیش دبئی میں موجود ہیں۔
بھارتی ٹیم نے دو دن کی مسلسل انتھک مشقوں کے بعد آج آرام کیا اور کچھ پلئیرز نے دبئی کے مختلف شاپنگ مقامات کا رخ کیا جبکہ بنگلادیش کے پلئیرز نے دو دن کی دھواں دار پریکٹس اور پاکستان شاہینز کیخلاف پریکٹس میچ کی شکست کو بھلانے کیلئے آرام کو ترجیح دی اور دبئی میں وقتاً فوقتاً ہونے والی بارش میں دوستوں سے گپ شپ کی اور کچھ نے ہوٹل میں سوئمنگ کی۔
یاد رہے کہ اب تک بھارتی کھلاڑی اپنی فیملیز کے بغیر ٹورنامنٹ میں شرکت کر رہے ہیں لیکن کئی کھلاڑی اپنی فیملیز کےلیے شاپنگ لسٹ ساتھ لائے ہیں اور دبئی میں فیملز کی فرمائش کردہ شاپنگ بھی کی۔
بدھ کے روز دونوں ٹیمز دبئی کرکٹ اسٹیڈیم میں دوبارہ پریکٹس کریں گی اور میڈیا سے گفتگو بھی کریں گی۔
اس دوران توقع ہے کہ شائقین کرکٹ بھی دونوں ٹیمز کی سپورٹ کیلئے ’ٹیمز بس‘ کے قریب جمع ہوں گے۔
چیمپئنز ٹرافی کے میچز کے حوالے سے دبئی میں جوش و خروش بڑھ رہا ہے۔ دبئی کرکٹ اسٹیڈیم کے اطراف ٹرافی کے خصوصی بورڈز اور بینرز نصب کر دیے گئے ہیں، جو ماحول کو مزید پرجوش بنا رہے ہیں۔
بھارت اور بنگلادیش کے درمیان آئی سی سی چمپئنز ٹرافی کا دوسرا میچ جمعرات 20 فروری کو دبئی کرکٹ اسٹیڈیم میں ہوگا، جس کا شائقین بےصبری سے انتظار کر رہے ہیں۔
