ریاض: سعودیہ نے حج کے سفر کیلئے نسک پورٹل کا اپ ڈیٹ ورژن لانچ کر دیا۔مقامی میڈیا کی رپورٹ کے مطابق سعودی عرب کے وزیر حج وعمرہ ڈاکٹر توفیق الربیعہ نے جدہ میں سفرِحج کے حوالے سے ’’ نسک‘‘ پورٹل کا اپ ڈیٹ ورژن لانچ کیا جس میں 100 سے زائد اضافی سروسز شروع کی گئی ہیں۔
انہوں نے حج کانفرنس ونمائش کے چوتھے ایڈیشن کے افتتاحی اجلاس سے خطاب کرتے ہوئے کہا کہ شاہ سلمان بن عبدالعزیز خاص ہدایات اور ولی عہد شہزادہ محمد بن سلمان کے تعاون سے گزشتہ سال حج وعمرہ زائرین کی تعداد 18.5 ملین سے تجاوز کرگئی۔
وزیر حج نے مزید کہا کہ گزشتہ سال مسجد نبویؐ میں روضہ رسولؐ کی زیارت کرنے والوں کی تعداد 13 ملین سے زیادہ رہی ہے، حجاج و زائرین کی سہولت کے لئے اعلیٰ تربیت یافتہ عملے اور ڈیجیٹل حج آپریشنز کے جامع نظام نے حج خدمات کی بہتر و منظم فراہمی کو یقینی بنایا۔
انہوں نے کہا کہ سفرِ حج جو کبھی بہت مشقت و تھکا دینے والا ہوتا تھا اب بہترین اور مثالی خدمات کی فراہمی کے باعث آسان اور اطمینان بخش ہو گیا ہے، انہوں نے اس بات پر زور دیا کہ مملکت کے پیشِ نظراللہ کے مہمانوں کی خدمت اولین ترجیح ہے۔
