بھارتی ٹیم ممبئی سے دبئی انٹرنیشنل ائیرپورٹ پہنچی ہے، دبئی ائیرپورٹ پر شائقین کرکٹ کی کافی بڑی تعداد نے ٹیم کا استقبال کیا، ائیرپورٹ سٹاف میں شامل شائقین کرکٹ بھی کرکٹ سٹارز کو دیکھنے اُمڈ آئے۔ اس بار بھارتی کرکٹ ٹیم بغیر ذاتی عملے کے دبئی پہنچی ہے کیونکہ بھارتی کرکٹ بورڈ نے حال ہی میں کھلاڑیوں کے ذاتی شیف اور ہیئر ڈریسرز ساتھ لے جانے پر پابندی عائد کر دی ہے، اس فیصلے کے تحت بھارتی کھلاڑیوں کو ایونٹ کے دوران دستیاب سہولیات پر انحصار کرنا ہوگاتاہم ائیرپورٹ پر شائقین کرکٹ نے کرکٹرز کے ذاتی عملے کی غیر موجودگی کو ضرور محسوس کیا جو ماضی میں کرکٹ سٹارز کے ارد گرد “ ہٹو بچو “ کی صدائیں بلند کرتے ہوئے نظر آتے رہے ہیں ۔
دبئی ائیرپورٹ پر موجود ایک مداح نے مذاقاً کہا، “اس بار بھارتی سٹارز کا فوکس کرکٹ پر ہوگا، نہ کہ ان کے ہیئر سٹائل پر!” بھارتی ٹیم میں کئی بڑے سٹارز شامل ہیں جن میں کپتان روہت شرما، سابق کپتان ویرات کوہلی، آل راؤنڈرز ہاردک پانڈیا اور رویندرا جدیجا، جبکہ وکٹ کیپرز رشبھ پنت اور کے ایل راہول نمایاں ہیں، دیگر اہم کھلاڑیوں میں کلدیپ یادو، ورون چکرورتی، شریاس آئیر اور فاسٹ بولرز ارشدیپ سنگھ اور ہرشیت رانا شامل ہیں۔ بھارتی ٹیم اتوار کو آئی سی سی اکیڈمی میں دوپہر کو پریکٹس کرےگی اورکچھ پلیئرز ہوٹل میں فزیکل ٹریننگ سیشن میں حصہ لیں گے۔ بھارت کا پہلا میچ 20 فروری کو بنگلا دیش کے خلاف دبئی انٹرنیشنل کرکٹ سٹیڈیم میں ہوگا، یہ مقام اس وقت منتخب کیا گیا جب بھارتی بورڈ نے پاکستان کا سفر کرنے سے انکار کر دیا۔
آئی سی سی چیمپئنز ٹرافی ایک ایسا ٹورنامنٹ ہونے جا رہا ہے جہاں نہ صرف کرکٹ کے روایتی حریف ہیڈ لائنز میں نظر آئیں گے بلکہ کھلاڑیوں کے اسٹائل اور بکھرے ہیئر اسٹائل بھی خبروں میں جگہ بناسکتے ہیں کیونکہ بھارتی بورڈ نے اسٹار کے کچھ پر ضرور کتر دیے ہیں۔ خیال رہے کہ یہ ٹورنامنٹ پہلی بار 1996 کے ورلڈکپ کے بعد پاکستان کی میزبانی میں ہو رہا ہے اور شائقین کرکٹ میں خاصی دلچسپی پیدا کر رہا ہے۔
