وزیر خزانہ کا اقوام متحدہ اور ترقیاتی شراکت داروں کیساتھ تعاون جاری رکھنے کا عزم

اسلام آباد: وفاقی وزیر خزانہ محمد اورنگزیب نے اقوام متحدہ اور ترقیاتی شراکت داروں کیساتھ تعاون جاری رکھنے کے عزم کا اعادہ کیا ہے۔وزیر خزانہ محمد اورنگزیب سے اقوام متحدہ کے ریزیڈنٹ کوآرڈینیٹر محمد یحییٰ نے ملاقات کی، اس موقع پر یونیسیف کے نمائندے عبداللہ فاضل بھی موجود تھے۔
ملاقات میں قرضوں کے انتظام، تنظیم نو اور ماحولیاتی فنانسنگ پر تبادلہ خیال کیا گیا، پائیدار ترقی کیلئے ترقیاتی شراکت داروں کے تعاون کی ضرورت پر زور دیا گیا، پاکستان اور عالمی بینک کے 10 سالہ کنٹری پارٹنرشپ فریم ورک کا حوالہ دیا گیا۔دوران ملاقات معاشی استحکام اور کلیدی اقتصادی اشاریوں میں بہتری پر روشنی ڈالی گئی، ماحولیاتی فنانسنگ اور سبز توانائی کے فروغ پر گفتگو ہوئی۔وزیرخزانہ محمد اورنگزیب کا کہنا تھا کہ پاکستان کو ماحولیاتی تبدیلی اور آبادی میں اضافے جیسے مسائل کا سامنا ہے، نجی شعبے کا طویل مدتی اور پائیدار ترقی میں کلیدی کردار ہے، پاکستان اقوام متحدہ اور ترقیاتی شراکت داروں کے ساتھ تعاون جاری رکھے گا۔