نوجوان اوپنر صائم ایوب نے پروٹیز کیخلاف وہ اعزاز 2 بار حاصل کرلیا جو سعید انور ایک مرتبہ بھی حاصل نہ کرپائے۔
صائم ایوب نے 3 میچز کی سیریز میں 2 سنچریاں سکور کیں، وہ پہلے انڈر 23 بیٹر ہیں جنہوں نے جنوبی افریقہ کے دورے پر ایک سے زیادہ سنچریاں بنائیں۔
قومی ٹیم کے مایہ ناز اوپنر سعید انور نے 1993ء سے 2002ء کے درمیان 17 ون ڈے کھیلے تاہم وہ پروٹیز کے خلاف نصف سنچری بھی نہیں سکور کرسکے، سعید انور نے محض 17.30 کی اوسط سے 398 رنز سکور کیے ، ان کا جنوبی افریقی ٹیم کیخلاف بہترین سکور 42 تھا جو انہوں نے اکتوبر 1994ء میں راولپنڈی میں سکور کیے تھے۔
دورہ جنوبی افریقا میں اپنی شاندار پرفارمنس سے دھاک بٹھانے والے نوجوان اوپنر صائم ایوب نے نامور کرکٹرز کی فہرست میں اپنا نام بھی درج کروالیا جس میں ڈیوڈ وارنر، فخر زمان اور جو روٹ شامل ہیں۔
تین میچز کی سیریز میں صائم ایوب نے 78.33 کی شاندار اوسط سے 2 سنچریاں بنائیں۔
نوجوان اوپنر نے محض 23 سال سے بھی کم عمر میں سابق کپتان سلمان بٹ اور کیوی کپتان کین ولیمسن جیسے کھلاڑیوں کیساتھ بھی جگہ پکی کرلی ہے۔
23 سال کی عمر سے پہلے سب سے زیادہ ون ڈے سنچریاں بنانے والے کھلاڑی جنوبی افریقہ کے کوئنٹن ڈی کاک ہیں جنہوں نے 52 میچوں میں 8 سنچریاں بنائیں، افغانستان کے رحمان اللہ گرباز 46 میچوں میں 8 سنچریاں بنا کر دوسرے، سچن ٹنڈولکر (بھارت) 116 میچوں میں 8 سنچریاں بنا کر تیسرے ، ویرات کوہلی (بھارت) 69 میچوں میں 7 سنچریاں سکور کرکے چوتھے ، پاکستان کے بابر اعظم 32 میچوں میں 6 سنچریاں بناکر پانچویں، احمد شہزاد (پاکستان) 51 میچوں میں 5 سنچریاں سکور کرکے چھٹے جب کہ صائم ایوب (پاکستان) 9 میچوں میں 3 سنچریاں بنا کر ساتویں نمبر پر ہیں
