کینیڈا سے آنے والی قومی ائیر لائن کے دو پائلٹس میں کورونا کی تصدیق

لاہور(نمائندہ خصوصی)کینیڈا سے وطن واپس آنے والی قومی ائیر لائن (پی آئی اے) کے دو پائلٹس میں کورونا وائرس کی تصدیق ہونے کے بعد دونوں کپتانوں کو ہسپتال منتقل کر دیا گیا ہے۔

وزیر صحت پنجاب ڈاکٹر یاسمین راشد کے مطابق پی آئی اے کے دو پائلٹس اور عملے کے دیگر تین ارکان کا کورونا ٹیسٹ کیا گیا جن میں سے دونوں پائلٹس کا ٹیسٹ مثبت آیا ہے۔

صوبائی وزیر صحت کے مطابق پائلٹس کا کورونا ٹیسٹ پازیٹو آنے کے بعد انھیں لاہور کے نجی ہسپتال میں منتقل کر دیا گیا ہے جہاں ان کی حالت بہتر ہے جب کہ منفی ٹیسٹ کے حامل عملے کے دیگر تین ارکان کو 15 دن الگ رہنے کی ہدایت کی گئی ہے۔

خیال رہے کہ گزشتہ روز پاکستان ایسوسی ایشن آف پائلٹس (پالپا) نے بھی قومی ائیر لائن کے کپتانوں کو جہاز اڑانے سے منع کر دیا تھا جب کہ سی ای او پی آئی اے ائیر مارشل ارشد ملک نے کراچی ائیرپورٹ پر قومی ائیر لائن کے جہاز کے عملے کو زبردستی قرنطینہ میں رکھنے کے اصرار پر کراچی سے بین الاقوامی فضائی آپریشن بند کرنے کا اعلان کر دیا تھا۔